သတ္တ၀ါတိုင်း ဘေးရန်ကင်းကွာချင်သူချည်းဘဲ၊ မိမိရဲ့ချမ်းသာရေးကို မလိုလားဘူးဆိုတဲ့သူ ဆိုတာလောကမှာ မရှိနိုင်ဘူး။ ဘေးရန်ကင်းကွာစွာနေထိုင်ရခြင်း အကျိုးအလို့ငှါ နည်းလမ်းတွေ ရှာဖွေကြတယ်။ ရှာရင်းနှင့်ဘဲ ကိုယ်ဆင်းရဲ စိတ်ဆင်းရဲဖြစ်ကြရတယ်။ ဘေးရန်တွေနှင့်ဘဲ ကြုံတွေ့နေကြရတယ်။ နည်းလမ်းမမှန်၊ အကျင့်မမှန်ကြလို့သာ ကိုယ်ဖြစ်ချင်သလို မဖြစ်ကြရတာပါ။ ဒါကြောင့်တကယ်စိတ်ချမ်းသာချင်တယ်ဆိုရင် ဒီကျင့်ဝတ်ကိုလက်တွေ့ကျင့်သုံးကြည့်ပါ။
တခြားတော့မဟုတ်ဘူး၊ သတ္တ၀ါတိုင်းရဲ့အပေါ်မှာ မေတ္တာထားကြည့်လိုက်ပါ။ မေတ္တာဆိုတာ ချစ်တာနှင့်မတူဘူးဆိုတာတော့ သတိပြုရလိမ့်မယ်။ မေတ္တာထဲမှာ ချစ်တာတွေရောနေလို့ ဆင်းရဲနေကြရတာပါ။ ဦးဆုံးအချစ်အကြောင်း ပြောမယ်။
အချစ်ကို သုံးမျိုးခွဲနိုင်တယ်။
၁. တဏှာနှင့်ချစ်တာ လင်မယားချစ်
၂. မောင်နှစ်မချစ်၊ မိဘနှင့်သားသမီးချစ်၊ ဆရာတပည့်ချစ်
၃. မိတ်ဆွေချစ် အကျိုးမျှော်ပြီးတော့ ချစ်ခင်တာမျိုး
လင်မယားချစ်ကျတော့ တဏှာနှင့်ချစ်တာမို့ ပိုပြီးတော့ သံယောဇဉ်လဲကြီးတယ်။ အချစ် ကြီးတယ်လို့ပြောရမယ်။ နက်ရှိုင်းတာမို့ ဖြတ်ရခက်တယ်။ မနာလိုမှု ၀န်တိုမှု တွေလဲပါနိုင်တယ်။ ဒီအချစ်ကြောင့်ဘဲ လူတွေဟာစိတ်ဆင်းရဲရတာတွေများတယ်။ အချစ်တခုဟာ ဒုက္ခတခုဘဲ။ကောင်းစေလိုတဲ့စိတ် ချမ်းသာလိုတဲ့စိတ်နှင့်ချစ်တာမျိုးကျတော့ အေးမျှတယ်။ အဲဒါကမေတ္တာပါ။ လင်မယားချစ်မှာ နှစ်မျိုးလုံးပါဝင်ပေမဲ့ တဏှာယာဂနှင့်ချစ်တာက ပိုများတယ်။ မောင်နှမချစ်၊ မိဘနှင့်သားသမီးချစ်၊ ဆရာတပည့်ချစ်ထဲမှာလဲ အချစ်နှင့် မေတ္တာရောနေ တာပါဘဲ။ ဒါပေမဲ့ လင်မယားချစ်ကတော့ ပိုပြီးတော့ တဏှာများတယ်။ အတွယ်များတယ် နက်ရှိုင်းတယ်။မိတ်ဆွေအချင်းချင်း ချစ်ခင်တာကျတော့ သူလိုတဲ့အခါငါကူညီလို့ ငါလိုတဲ့အခါ သူကဖြည့်ဆည်းလို့ ချစ်ခင်တွယ်တာကြတယ်။ ဒါလဲ အချစ်နှင့် မေတ္တာရောနေသေးတာ ဘဲ။ ဒါကျတော့ အတွယ်နည်းနည်းပေါ့သွားတာပေါ့။ တဏှာချစ်ကျတော့ ကိုယ်တဦးတည်းပိုင်ဆိုင်ချင်တယ်။ ကိုယ့်အပြင်သူတပါးကို ချစ်ခင် တွယ်တာသွားမှာကို မလိုလားဘူး။ မနာလို ၀န်တို စိတ်တွေ ဖြစ်စေနိုင်တယ်။ သူ့ကြောင့် သောကတွေ ပရိဒေ၀တွေဖြစ်ရတတ်တယ်။ သူတို့ကို အာရုံပြုလိုက်ရင် စိုးရိမ်မှုတွေ သောကကြောင့်ကျမှုတွေဝင်လာတတ်တယ်။ ဒါတွေဟာ အပူတရားတွေချည်းပါ။ အပြစ်လုပ်ရင်လဲ ခွင့်မလွတ်နိုင်ဘူး။ မကျေနပ်မှုတွေဖြစ်ရတတ်တယ်။ မေတ္တာကျတော့ သူတို့ကို အာရုံပြုမိတဲ့အခါ စိတ်ထဲမှာအေးမျှလာတယ်။ မေတ္တာလား တဏှာလားဆိုတာကို ဝေဖန်ကြည့်လိုက်ပါ။ စိတ်ထဲမှာ စိုးရိမ်လာမှုတွေပေါ်လာရင် မေတ္တာ မဟုတ်ဘူး တဏှာနှင့်တွယ်နေတာလို့ မှတ်လိုက်ပါ။ မေတ္တာကျတော့ ခွင့်လွတ်တယ်၊ မိမိမေတ္တာရှိသူရဲ့အကျိုးကို လိုလားတယ်။ သူစိတ်ဆင်းရဲမှာကို မလိုလားဘူး။ သူချမ်းသာ တာကိုဘဲ မြင်လိုကြားလိုတယ်။ ဒါကြောင့် ဘယ်သူ့အပေါ်ဘဲဖြစ်ဖြစ် တဏှာနှင့် မခင်တွယ်ဘဲ၊ မေတ္တာနှင့် တဦးကို တဦး စောင့်လျှောက်နိုင်ကြမယ်ဆိုရင်တော့ အေးချမ်းလာနိုင်တယ်လို့ ဆရာသမားတွေက အကြံပေးတယ်။ မေတ္တာသမားဆီမှာ ရန်ညှိုး ဖွဲ့ထားတဲ့သူဆိုတာမရှိရဘူး။ ဒါပေမဲ့ ကိုယ့်ကိုနစ်နာအောင် လုပ်မယ်ပြောခဲ့မယ်ဆိုရင်တော့ စိတ်ထဲမှာ ခုနေမိမှာအမှန်ဘဲ။ အဲဒီအခါကျရင် ထိုသူကို ခွင့်လွတ်နိုင်အောင်ကြိုးစားရလိမ့်မယ်။ လူတယောက်ဟာ ဘယ်တော့မှ ခြောက်ပစ်ကင်းသဲလဲစင် မဖြူစင်နိုင်ဘူး။ မတော်နိုင်ဘူး။ ဒါပေမဲ့ လူတကိုယ်မှာတော့ ကောင်းကွက်လေးတော့ ကိုယ်စီရှိတတ်ကြပါတယ်။ ကောင်းကွက်ကိုရှာ မေတ္တာတဲ့။ သံသရာဆိုတာ အရှည်ကြီးဘဲတဲ့။ ကိုယ်နှင့်အဆင်မပြေ ဖြစ်နေတဲ့သူဟာ အတိတ်ဘ၀တခုခုမှာ ကိုယ့်ရဲ့ မောင်နှမ မိဘ တမျိုးမျိုး မတော်ခဲ့ဘူး လို့ ဘယ်လိုမှ မပြောနိုင်ဘူး။ ဒါကြောင့် ခွင့်လွတ်ဖို့ သီးခံဖို့ ဒီလိုတွေးပြီးတော့လဲ မေတ္တာထားကြည့်လိုက်ပါတဲ့။
ကြိုးစားပြီးတော့ မေတ္တာများများထားနိုင်အောင် ကြိုးစားကြည့်ကြရအောင် . . .
